بقلم الشاعر المبدع / أشرف الشناوي
............. ام العصافير .........
لو هازعل م الدنيا بحالها
طب هازعل منك و ازاي
دا انا قلبي مافيه غيرك يامه
صوتك كان أجمل م الناي
انا فاكر وشك وملامحك
وعيونك بتخبي في جرحك
والراكيه وبراد الشاي
تاخدينا كمان يامه في حجرك
وفي ليل امشير
ونحس الدفا جاي من صدرك
على ريحته نطير
ونخاف ازاي واحنا في حضنك
زي العصافير
كان عشك أجمل م الدنيا
واحلامه كتير
الوقتي خلاص من غير حضنك
خايفين لانطير
بياخدنا الهوى يلعب بينا
واهو توهنا خلاص من بعضينا
وسط المقادير
لو هازعل م الدنيا بحالها
مش هازعل منك لو ثانيه
دا انا قلبي ماحسش بالدنيا
غير سجن كبير
من غيرك ايه معنى الغنوه
يام العصافير .................
اشرف الشناوي
شاعر عاميه
البرامون
المنصوره
تعليقات