بقلم الشاعر المبدع/ د . هشام سليم
سلامٌ عليكم وليكم وبيكم
ومش مستنّي تردو السلام
واجب عليا إني أحييكم
ومش ضروري سماع الكلام
لازم أقول وأعيد وازيد
وعندي إرادة ياناس من حديد
حقول كلام قديم مش جديد
جار عليه زمان نسيان
لما القلب صار تعبان
فين الحب بتاع زمان؟
فين الدفا؟
فين الصفا؟
فين البراءة بدون فلسفة؟
فين الحركة فين البركة؟
فين التعاون فين الشركة؟
فين الإيد بتسند إيد؟
فين التلاقي ف ليلة عيد؟
والمواعيد
فين السؤال علي كل الأهل؟
طبع حياتنا الحلو السهل؟
إيه العبارة؟
فين الزيارة؟
ملعون أبوها
كلمة حضارة
خبطة باب لجل عتاب
الكل قرايب مش أغراب
كبير دا عمي
شايل همي
كبيرة خالتي
تقدّر حالتي
فين التجمع ف مناسبة؟
وناس عفوية مش حاسبة
فينك قولي يازغروطة؟
الفرحة صارت مربوطة
القسوة ف قلب محطوطة
فين ترابك ياشوارع؟
فين الخير يامزارع؟
فين اللي نازل؟
فين اللي طالع.؟
فين الأدب والأخلاق؟
ليه النفاق؛؟
القلب فاق
حياتنا ماشية بالآلة
بقينا فيها ياناس عالة
الدنيا ماشية بالريموت
الخلق عايشة ف حالة موت
معدش حوار كله سكوت
حفضل أقول ومش حَمِل
لحد ياناس ماألاقي الحل
وده كله سببه حبي ليكم
سلامٌ عليكم وليكم وبيكم
ومش مستنّي تردوا السلام
كلمتين كانوا ف ضميري
عشان مايكنش عليا ملام
بحييكم فرض عليكم
يللا كله يرد السلام
د. هشام سليم
شاعر الحرافيش
تعليقات