بقلم الشاعر المبدع / د . هشام سليم
من زمان ومن سنين
قبل مندوق الأنين
لما كان في أمل
وفي حنين
كانت حياتنا مفهومة
وحدودها كانت معلومة
كان في أصول
وفن قول
ممكن تقول كل خير
كان في ضمير
نسقي الحب حبة حبة
يطرح قلب فيه محبة
الاختلاف. كان بعفاف
وكل كلمة محسوبة
لا في ملاوعة ولا التفاف
والحكمة كانت مطلوبة
كان في حلال وفي حرام
كان في غرام للاحترام
حلو الكلام ع الشفة
وبناتنا رمز للعفة
وأغاني الفرح ف الزفة
كبير دا عمي
كبيرة خالتي
بيشيلوا همي
فاهمين لحالتي
زمن البراءة
زمن الجراءة
وكله صبر
الكلمة جبر
زمن يوافي
بكلمة عوافي
الحارة بيتنا
وكله خوات
وسعادتنا
ف الحكايات
عن الرجولة
من الطفولة
فين أيامك ياشبابي
زمن قرايبي وأحبابي
أنا زي ما أنا
عشت الهنا
ف الحارة
شعبي أصيل بجدارة
زمانا ليه بقي بيحير
وكل حاجة بتتغير
كله ضاع
حل محله غش وخداع
وناس مش سالكة
فين البركة
حالنا مال
بقي يتقاس بالأموال
والنفاق
حل محلك ياأخلاق
والبلطجة والعربجة
ومصايب نت وبرمجة
الطف بينا يارب الكون
وابعت لينا نجدة وعون
وبقدرتك نجينا
احفظ أمانا ف وادينا
وانصرنا علي مين يعادينا
د. هشام سليم
شاعر الحرافيش
تعليقات