بقلم الشاعر المبدع / د . هشام سليم
الصباح دا غير
شكله وش خير
سنة جديدة
بادية سعيدة
رغم إننا علي الحديدة
نهار وشكله متوضّي
وحبة رذاذ بتهدّي
سنة بتقولك مين أدّي
ياأرض اتهدي
وأنا أبنيكي بتفاؤل
ماتخافي مني حكون عاقل
أنا متسائل
شايلالي إيه؟
أهل النجوم قبل كده
اشتغلوني
قالوا كلام مليان سلام
وخدعوني
أيامك حلوة مزهزهة
عصافيرك طايرة مزقزقة
وكله بلح
وقلبي انجرح
وفكري سرح
أنام وأقوم
علي الهموم
ف كل يوم
جاني المرض
عليا انفرض
شفت الموت
ودقت طعمه
وقلبي العليل
ربي رحمه
ياتري سنة
فيكي شقا ولا هَنا
مليانة شوك ولا فيكي
سوْسَنة
مفيش ف إيدي إلا الدعاء
يارب السماء
اجعلها بيضا علي العباد
لحد ما يجيلنا المعاد
انشر وداد
ف سنة جديدة شكلها سعيدة
فيها ضمير
اجعل ياربي أيامها خير
د. هشام سليم
شاعر الحرافيش
تعليقات