بقلم الشاعر المبدع / أشرف الشناوي
............ خمسينة شاي..............
تسمحلي بكوباية شاي
نتكلم انا وانت شويه
في الرايح والجاي
نفتكر الايام الحلوه
وبقينا خلاص وفي سكتنا
اغراب وازاي
فاكر غناوينا وضحكتنا
كان أجمل حاجه في دنيتنا
كان طعم الشاي
ماتقول ايه بس اللي اتغير
ماهي نفس الدنيا
اللي تحير
ماهو نفس الشاي
تسمح بدقيقه ومن فضلك
كوباية شاي
ليه سيبت الحزن يفرقنا
ونسيت ان احنا ماصدقنا
نهرب ونكمل في حياتنا
من غير الناس
ورسمنا طريقنا لوحدينا
وتعبنا لحد ماعدينا
وعملنا اساس
معقوله يكون كل مابينا
كان وهم كبير وماهوش جنه
ولا فيه احساس
تسمح بدقيقه ومن فضلك
نقعد نتحاسب من تاني
مين المظلوم مين الجاني
مش عاوز بس الا ثواني
وخمسينة شاي
...........................
اشرف الشناوي
شاعر عاميه
البرامون
المنصوره
تعليقات