بقلم الشاعر المبدع / اشرف الشناوي
......... غني في وجعك.......
لما تفارق حد تحبه
خلي في قلبك برضه مكان
وبلاش تقطع حبل موده
عايش بينكم بقالوا زمان
وبلاش تقفل باب الرحمه
علشان تفضل كدا انسان
وازرع جوا الخلق محبه
تفضل ليك وانت الكسبان
بكره الدنيا تلف وترجع
تلقى اللي انت زرعته اوام
افتح قلبك عيش واتهني
واوعى تكسر فيك الاحزان
غني في وجعك وارسم حلمك
حتى ان كان قلبك بردان
بكره تلاقي الصبح معدي
شايل ليك كل الاحلام
تلقى الفجر بيرمي عباته
يلم الليل وتعيش في سلام
فاغسل روحك وارمي وجعها
تلقى الروح زى الدبلان
لما تفارق حد تحبه
خلي في قلبك برضه مكان
خليك عصفور طاير دايما
يرقص فوق كل الاغصان
واوعى الجرح يحاوط قلبك
يعمل سجن وسور وحيطان
النور مهما يكون مايحبش
انه يعيش وعليه سجان
لما تفارق حد تحبه
خلي في قلبك برضه مكان
..................
اشرف الشناوي
شاعر عاميه
البرامون
المنصوره
تعليقات