بقلم الشاعر المبدع / د . هشام سليم
رقبتي للي يصون
وغضبي للي يخون
وإن جار عليا الكون
برضو أنا راضي
أصل الزمن قاضي
حكمه ياناس ماضي
ومشمول بالنفاذ
تلميذ أو أستاذ
ع الهادي أو نزناز
بيته ماسك نفسه
أو حتي من إزاز
أصل الزمن جبار
ملوهش مستشار
يا يعيشك ف جنة
أو حتي تعيش ف النار
الكل أصاده ضعيف
ومفيش لعّيب حريف
يقدر يغلبه
الزمن حيعذبه
اوعي ف يوم تتغر
من سطوته تنضر
عمرك ماتبقي حر
حكم الزمن عبودية
مش حادثة ومعدّية
عيش ف الدنيا ديّه
خاضع للزمن
ولو يسقيك الشجن
معدش ف إيدك إرادة
خضوعك هوه العادة
ولو حتعوز سعادة
عيش كما المجنون
ورقبتك للي يصون
وغضبك للي يخون
وإن جار عليك الكون
برضو تكون راضي
ومهما الزمن يدّيك
حتسيب الدنيا فاضي
د.هشام سليم
شاعر الحرافيش
تعليقات