بقلم الدكتور / علوى القاضى

!!!...الجواز وسنينه...!!!

 . .        رؤية :

. . د/علوى القاضى.

                 ،،، رسالة تصحيح مفاهيم ،،،

. .  الي كل زوج زهق من مشاكل اسرته ومتهيأله انه عمل كل اللى عليه طول السنين اللى فاتت (حسب وجهة نظره ) ، ومش قادر يستحمل زيادة ، وخايف انه يخسر اكتر من اللى خسره ( برضه حسب وجهة نظره )

. . إلى كل زوج  قرر انه يبعد ،  وشايف أنه مش هينفع يكمل حياته مع اسرته لان الولاد كبروا . ويقدروا يعتمدوا على نفسهم من غيره ( برضه حسب وجهة نظره ) وهو كدة كدة هايسيب لهم اللى يكفيهم . وكل ده لأنه فيه شيطان إنس مسيطر عليه وعلي عقله 

. . بأقول لك أخى الكريم  بص لاولادك وهم بيحطوا لك الاطباق ، ومامتهم فى المطبخ وهم منظمين جداً ونضاف جداً .. جدا  وبيحطوا لك الاكل بمنتهى الأدب 

. . وماتنساش انك بقالك كتير ما أكلتش معاهم 

. . وانت قاعد معاهم تلاقيهم بيتكلموا مع مامتهم فى حياتهم وظروفهم وهى بكل حكمة بترد عليهم

. . وشوفهم بعد مايخلّصوا الاكل. ويدخلوا اوضتهم

. . وشوف امهم وهى واقفة بتنضف المطبخ 

. .المفروض تحمد ربنا أن لك اسره وزوجه صالحه واولاد متربيين وعلشانهم  تستنى ميعاد رجوعك.علشان تطمن عليهم وتقعد تتكلم معاهم ومع امهم والمفروض ماتضايقش منهم وتتمني ان الوقت مايعدّيش وانت معاهم ، والمفروض ترفع  سماعة التليفون ..

وتتاسف للشيطان الانسي وتقول لها مش هينفع نتقابل تانى وتنهي كل حاجه تبعدك عن ربنا وعن اسرتك .

. . وتقول لنفسك  انا لازم اكون موجود فى البيت كل يوم .. وبعدها ..تاخد اجازة وتقضىها  فى البيت مع اسرتك كلها

. . لازم تراجع نفسك وتشوف شريط حياتك يمر قدام عينيك وتفتكر الموده والسكن والرحمه اللي في بيتك والوفاء وطول العشره الطيبه 

. . وتبوس ايدك وش وضهر وتوطّى على ايد زوجتك وتبوسها . وتحسسها بتقديرك وامتنانك لمجهودها وتعبها طول السنين اللي مرت عليكم وماتسيبهاش عايشه لوحدها كمان لازم تعرف انك كنت بتوحشها في غيابك جدا .  وماتنساش الفضل بينكم وولادك  اللى ماحسيتش عمرك بتعب فى تربيتهم ..علشان كنت سايبهم لها ..وضيعت سنين عمرها وشبابها في تربيتهم وهي ساكتة ومستحمله وعايشة عشان خاطر البيت والأولاد 

. . إدع لها أن ربنا يمد فى عمرها ويديها الصحه والعافيه 

. . وكمان تعوضها عن اللى راح من صحتها وشبابها

. . والنجاح الأكبر .ان حياتكم تبتدي بشكل جديد بروح جديده فيها مزيد من الثقه والاحترام والحب  والتقدير..

. . وتحافظ علي بيتك وزوجتك شريكة عمرك واولادك

. . واعرف ان لو بيتك نضيف..وولادك متربيين كويس ..

. . ولو هدومك نضيفة ومكوية ..ودولابك ريحته حلوة ..

. . ولو شراباتك موجودة فى مكانها وكتبك مافيش عليها تراب . لو كل حاجة من حاجتك بتدوّر عليها وتلاقيها ..

. . وبتاكل الاكل اللى نفسك فيه  يبقى تأكد .. ان مافيش قوى خفية بتعمل كل ده لأن اللى بيعمل كدة .. زوجتك حبيبتك روحك اللي موجوده في جسدها

. . يابختك لو لسة عندك فرصة تراجع نفسك ..

. . يا بختك لو قادر تاخد قرارك  انك تعيش ابوّتك صح ..

. . يا بختك لو عرفت تفتح عينك عشان تشوف الحقيقة بوجهة نظر تانية  يابختك لو عرفت تعمل كل ده ..

. . صدقنى هتفرح أكتر واكتر

. . لاتنسى إن زوجتك اتربت على إيد والدتها من الجيل القديم يعنى اتربت علي الأصول وصون العشره وأصحاب الكلمه الطيبه والمعيشه والاسره ولم الشمل والقيم

. . الستات زمان  كانت ستات جبابرة 

. . ايه ده ولايطلقوا ولا يزعلوا . وكانوا طباخين مهره ومتعلمين اكلات من الاف السنين متوارثه

. . وتخيل بتملأ مياه لأن مفيش حنفيات ولا طقم بارد وسخن ..وهي اللي بتروح تملأ ٥٠ مره في اليوم

. . وتخيل مفيش مجاري هتروح فين ترميها والشوارع كلها خناقات بسبب كب المياه في الشارع 

. . وكيف تغسل على ايديها جرب تغسل فانله على ايدك كده اشحال لكل الاسرة ال١٥ كل يوم وتنشر كل يوم 

. . وتروح السوق كل يوم مفيش ثلاجات اصلا ولا بوتجاز والوابور كل يوم يبوظ

. . والناس كانت بتاكل وترمي وهي تلم وتغسل المواعين

 . . وتخبز في الفرن احلى عيش  وتعمل بعد العيش الارز المعمر وصنية البطاطس التي لامثيل لها 

. . وترضع وتغير ومفيش بامبرز طبعا وتروح تطحن الدقيق ...وتربي فراخ وبط وتشيل زبالتهم وتنظف 

. . وفي نهاية اليوم تعمل عصيدة ولا كنافه ملهاش حل 

. . وشاي لكل واحد في الاسرة وقرص وكعك وغريبه بالشوال مش كيلو وتوديه الفرن ومع ذلك مكنتش عاجبه 

. . االله يرحمهم ويدخلهم فسيح جناته يارب ويجمعنا بيهم في الجنه

. . أفيقوا  معشر الرجال أثابكم الله وغفر لى ولكم

. . تحياتى . .